Kraze Baryè Lengwistik yo: HHS bay Plan Aksè Lengwistik ki Presi pou Chak Divizyon nan tout Ministè an

Nan mwa Novanm 2023, Ministè Sante ak Sèvis Sosyal Etazini an (HHS) te rejwenn ajans yo atravè gouvènman federal la nan priyorize kominikasyon nan sèvis li yo lè li pibliye Plan Aksè Lengwistik li an nan tout ministè a. Avèk piblikasyon plan li a, HHS te fè yon gwo pa nan direksyon pou asire moun ki gen yon konpetans limite nan anglè (LEP) ak moun ki gen andikap yo gen plis aksè ak sèvis pou sove lavi li bay yo.

Jodi a, kòm aboutisman efò sa a, e anvan 24yèm anivèsè Dekrè Egzekitif 13166 la, "Amelyore Aksè ak Sèvis pou Moun ki gen Konpetans Limite nan Anglè yo," Ministè an te pibliye plan aksè lengwistik presi pou chak divizyon. Efò sa a fè prèske tout divizyon operasyonèl yo ak pèsonèl HHS la montre angajman Ministè an pou bay swen sante ak sèvis sosyal ki aksesib, konpetan sou plan kiltirèl ak lengwistik, e konplè.

"Retire baryè ki anpeche moun jwenn aksè ak swen sante e soutyen sèvis sosyal yo se youn nan pi gwo priyorite nou yo," Sekretè HHS Xavier Becerra te di. "HHS kontinye elaji aksè, ansanm ak aksè lengwistik, pou tout moun ka resevwa èd yo bezwen ak merite an. Anplis plan nou pou tout ministè an nou te pibliye ane pase a, chak divizyon endividyèl nan HHS te etabli pwòp objektif yo e plan yo ki vize pou plis elaji aksè. Angajman Administrasyon Biden-Harris lan pou ekite ak enklizivite rete fèm epi li pwolonje nan chak pati nan travay HHS fè chak jou nan non pèp ameriken an."

"Jodi a, nou selebre yon etap enpòtan pandan n ap devwale ak fyète Plan Aksè Lengwistik yo ki ajou pou tout HHS la. "Plan sa yo montre angajman enkondisyonèl nou pou egalite nan aksè ak sèvis sante e sèvis sosyal yo, asire w swen disponib e aksesib pou moun yo nan lang natif natal yo, e kominikasyon yo efikas pou moun ki andikape yo," Melanie Fontes Rainer, Direktris Biwo Dwa Sivil HHS la ak Prezidant Komite Direktè Aksè Lengwistik HHS la, te di. "Sa a se yon temwanyaj devouman san kanpe nou pou asire tout moun atravè nasyon an, kèlkeswa lang oswa kapasite li, ka jwenn aksè ak sèvis e enfòmasyon enpòtan yo bezwen nan swen sante."

Sou direksyon Komite Direktè Aksè Lengwistik nan tout Ministè an, ki gen pou dirijan Biwo Dwa Sivil HHS la, eleman sa yo nan Ministè an te devlope plan konplè aksè lengwistik:

1. Administrasyon pou Timoun ak Fanmi yo (ACF)
2. Administrasyon pou Lavi Kominotè (ACL)
3. Administrasyon pou Preparasyon ak Repons Estratejik (ASPR)
4. Ajans pou Rechèch ak Kalite Swen Sante (AHRQ)
5. Sant pou Kontwòl ak Prevansyon Maladi (CDC)
6. Sant pou sèvis Medicare ak Medicaid yo (CMS)
7. Administrasyon pou Manje ak Medikaman (FDA)
8. Administrasyon Resous ak Sèvis Sante yo (HRSA)
9. Sèvis Sante pou Endyen yo (IHS)
10. Enstiti Nasyonal yo pou Sante (NIH)
11. Administrasyon pou Depandans ak Sibstans e Sèvis Sante Mantal yo (SAMHSA)
12. Sekretè Adjwen pou Administrasyon an (ASA)
13. Sekretè Adjwen pou Resous Finansye yo (ASFR)
14. Sekretè Adjwen pou Lejislasyon an (ASL)
15. Sekretè Adjwen pou Planifikasyon ak Evalyasyon (ASPE)
16. Sekretè Adjwen pou Dosye Piblik yo (ASPA)
17. Asistan Sekretè Politik Teknoloji ak Biwo Koòdonatè Nasyonal Teknoloji Enfòmasyon Sante (ASTP/ONC)
18. Komisyon Kontestasyon Ministeryèl yo (DAB)
19. Dosye Ekstèn Entègouvènmantal yo (IEA)
20. Biwo pou Dwa Sivil yo (OCR)
21. Biwo Sekretè Adjwen Sante an (OASH)
22. Biwo Dosye Mondyal yo (OGA)
23. Biwo Enspektè Jeneral la (OIG)
24. Biwo Odyans ak Kontestasyon Medicare yo (OMHA)
25. Biwo pou Sante Minorite yo (OMH)

Nou gendwa jwenn Plan Aksè Lengwistik HHS pou ane 2023 ki ajou nan plizyè lang, Plan Aksè Lengwistik pou divizyon HHS yo, ak resous anplis gendwa disponib nan www.hhs.gov/lep. 

Deklarasyon Direktè HHS yo sou Plan Aksè Lengwistik Presi pou Chak Divizyon HHS yo

Xavier Becerra, Sekretè HHS
"Retire baryè ki anpeche moun jwenn aksè ak swen sante e soutyen sèvis sosyal se youn nan pi gwo priyorite nou yo. HHS kontinye elaji aksè, ansanm ak aksè lengwistik, pou tout moun ka resevwa èd yo bezwen ak merite an. Anplis plan nou pou tout ministè an nou te pibliye ane pase a, chak divizyon endividyèl nan HHS te etabli pwòp objektif yo e plan yo ki vize pou plis elaji aksè. Angajman Administrasyon Biden-Harris lan pou ekite ak enklizivite rete fèm epi li pwolonje nan chak pati nan travay HHS fè chak jou nan non pèp ameriken an."

Jeff Hild, Sou-Sekretè Adjwen Prensipal pou Timoun ak Fanmi yo (ACF) e Sekretè Adjwen Pwovizwa pou Timoun ak Fanmi yo (ACF)
"Administrasyon pou Timoun ak Fanmi yo (ACF) kontinye poze aksyon pou ogmante aksè ak pwogram nou yo e nou fyè dèske n ap aplike Plan Aksè Lengwistik HHS la ki ajou epi esansyèl. Aplikasyon plan esansyèl sa a demontre angajman san kanpe nou an pou divèsite, ekite, enklizyon, ak aksè atravè plis pase 60 pwogram ak sèvis ACF pou timoun, jèn, fanmi, kominote ak sibvansyon nan tout peyi a."

Alison Barkoff, Kad k ap egzèse fonksyon Administratris Administrasyon pou Lavi Kominotè an ak Sekretè Adjwen pou Vyeyisman (ACL)
"ACL pran angajman pou l asire tout granmoun aje yo ak tout moun ki andikape yo ka jwenn aksè ak pwogram e sèvis nou finanse yo. Rann enfòmasyon disponib nan yon varyete lang ak fòma - tankou lang siy ak fòma Easy Read ki pi aksesib pou alafwa moun ki gen andikap entèlektyèl ak moun ki gen konpetans limite nan lekti nan anglè - se yon pati enpòtan nan angajman sa a."

Dawn O'Connell, Sekretè Adjwen pou Preparasyon ak Repons (ASPR)
"Katastwòf ka rive nenpòt kote nan peyi Etazini epi afekte nenpòt moun. Lang pa ta dwe janm yon baryè pou chèche ak resevwa soutyen ki nesesè pou reyaji ak retabli apre yon ijans. Bay sèvis aksè lengwistik ak kominikasyon ki enpòtan pou tout moun, ansanm ak moun ki gen konpetans limite nan anglè, pral ranfòse kapasite nasyon nou an pou prepare, reyaji ak retabli apre katastwòf. Plan Aksè Lengwistik ASPR la make 24 lane pwogrè depi Dekrè Egzekitif 13166 la te siyen, epi li pral gide ASPR pou asire n ap bay aksè enpòtan ak tout pwogram e sèvis nou yo."

Dr Bob O. Valdez, Direktè, Ajans pou Rechèch ak Kalite Swen Sante yo (AHRQ)
"Pandan popilasyon pasyan yo vin deplizanplis divès, li esansyèl pou òganizasyon swen sante tout kalite ak tout gwosè angaje yo nan devlope plan aksè lengwistik pou kominike nan yon fason efikas atravè divèsite nasyon nou an ak nivo konesans sou sante pou asire livrezon bon jan kalite swen ki santre sou pasyan yo. AHRQ se yon patnè fyè nan Plan Aksè Lengwistik HHS la ak 24yèm anivèsè Dekrè Egzekitif 13166 la. Konsantrasyon AHRQ sou kreyasyon zouti ak resous ki ankouraje enklizyon moun ki gen yon konpetans limite nan anglè yo nan rechèch ede avanse etid konesans sou sante an ak ranpòte viktwa sou diferans nan swen yo. Sa ki pi enpòtan, li ankouraje bay sèvis swen sante ki reponn ak preferans kiltirèl e lengwistik divès konsomatè yo nan nasyon nou an, sa ki lakoz pi bon rezilta swen."

Cheryl R. Campbell, Sekretè Adjwen Administrasyon an (ASA)
"Mwen fyè pou angajman san kanpe nou ak Dekrè Egzekitif 13166 la epi pou asire nenpòt ameriken ki bezwen sèvis HHS yo kapab jwenn aksè ak yo, kèlkeswa lang prensipal yo. Plan Aksè Lengwistik nou an se yon eleman enpòtan pou bay moun yo pouvwa pou yo konplètman angaje yo nan swen sante yo epi li montre devouman HHS pou sèvi kominote nou yo ekitab."

Lisa Molyneux, Sekretè Adjwen Prensipal pou Resous Finansye yo (ASFR), k ap egzèse fonksyon ki delegab Sekretè Adjwen pou Resous Finansye yo.
"Bay aksè lengwistik ki enpòtan ak enfòmasyon esansyèl anpil pou avanse efò HHS yo pou ekite. Plan Aksè Lengwistik HHS lan kreye yon plan pou kominike nan yon fason efikas ak divès kominote ki konte sou pwogram nou yo, epi asire nou kontinye ap aprann e konsidere done ak resous pou abòde baryè yo idantifye yo."

Melanie Egorin, Ph.D., Sekretè Adjwen pou Lejislasyon an (ASL)
"Pi gwo aksè lengwistik vle di kominikasyon pi efikas sou priyorite HHS yo pou sove lavi pou elektè chak manm nan Kongrè an sèvi yo. Se lalwa tou. Se poutèt sa plan nou an pran mezi enpòtan pou ogmante aksè pou moun ki gen konpetans limite nan anglè yo nan travay nou an, tankou enfòmasyon sou pwogram HHS ki enpòtan ak resous sante piblik."

Rebecca Haffajee, JD, Ph.D., MPH, Sekretè Adjwen Prensipal pou Planifikasyon ak Evalyasyon (ASPE)
"Nan 24yèm anivèsè Dekrè Egzekitif 13166 la, 'Amelyore Aksè ak Sèvis pou Moun ki gen Konpetans Limite nan Anglè yo,' Biwo Sekretè Asistans pou Planifikasyon ak Evalyasyon an (ASPE) fyè pou l prezante Plan Aksè Lengwistik nou an. Plan ASPE a reyafime objektif Ministè an pou asire chak moun gen aksè enpòtan ak pwogram e sèvis HHS yo, lè li angaje ASPE pou rann piblikasyon nou yo ak reyinyon piblik yo aksesib pou moun ki gen konpetans limite nan anglè (LEP) ak andikap nan tande, wè, pale ak lòt andikap. Prensipal kontribisyon ASPE nan sèvis lengwistik yo santre sou reyalize etid pou idantifye ak deskri estrateji pou kontounen baryè aksè lengwistik yo."

Jeff Nesbit, Sekretè Adjwen pou Dosye Piblik yo (ASPA)
"ASPA ap pran mezi pou ede sipòte Ministè an nan travay li pou elaji aksè ak sèvis HHS yo. Sa fè pati angajman jeneral HHS pou pwoteje dwa moun pou jwenn aksè ak bon jan kalite swen sante ak sèvis sosyal esansyèl yo. Plan Aksyon Lengwistik nou an adapte ak responsablite san parèy nou nan Biwo Sekretè a – sètadi pou ede tout lòt divizyon yo fè pwomosyon politik ak pwogram yo.  Pandan n ap kontinye evolye kòm yon divizyon, n ap kenbe plan nou yo ajou pou asire n ap fè tout sa nou kapab pou sèvi pèp ameriken an."

Doktè Mandy Cohen, Direktris Sant pou Kontwòl ak Prevansyon Maladi yo (CDC) ak Administratris Ajans pou Sibstans Toksik ak Rejis sou Maladi yo (ATSDR)
"Mwen kontan anonse nouvo Plan Aksè Lengwistik CDC an pou 2024 la nan kad pi gwo inisyativ Aksè Lengwistik HHS la pu 2024 la. Asire enfòmasyon pou sove lavi nou yo disponib pou tout moun nan lang yo pi pito a se yon bagay enpòtan nan misyon nou pou pwoteje sante ak amelyore lavi yo. CDC an pran angajman pou asire chak nan pwogram nou yo gen yon plan pou bay sèvis ak resous nan fason piblik la ka konprann."

Chiquita Brooks-LaSure, Administratris, Sant pou Sèvis Medicare ak Medicaid yo (CMS)
"CMS rete angaje pou l asire moun ki jwenn sèvis nan pwogram nou yo gen aksè ak kouvèti swen sante enpòtan e enfòmasyon ajans nou an bay. Nou sitou sansib ak bezwen moun ki gen konpetans limite nan anglè ak moun ki gen andikap. N ap kontinye travay pou elaji efò nou yo pou plis moun kapab konprann opsyon yo epi yo ka jwenn aksè ak bon jan kalite pwoteksyon swen sante ki abòdab."

Onorab Constance B. Tobias, Prezidan, Komite Kontestasyon Ministeryèl yo
"Angajman DAB an pou rezoud diskisyon san patipri e jis genyen ladan l eliminasyon baryè ki genyen nan aksè lengwistik yo, yon fason pou yo bay yon pati dwa pou yo patisipe nan pwosesis la."

Robert M. Califf, MD, Komisè, Administrasyon pou Manje ak Medikaman
"Ofri resous ak sèvis aksè lengwistik sitou enpòtan pou travay nou fè nan FDA a. Diminye baryè lengwistik yo ka ede amelyore rezilta sante piblik epi ogmante konfyans ak transparans. FDA a angaje l pou l bay enfòmasyon pou konsomatè yo nan plizyè lang, epi pou l ede konsomatè yo, tankou moun ki gen konpetans limite nan anglè ak moun ki gen andikap, pran desizyon eklere sou sante ak sekirite yo." 

Carole Johnson, Administratris, Administrasyon Resous ak Sèvis Sante yo (HRSA)
"HRSA sipòte aksè ekitab nan swen sante pou kominote ki pi bezwen yo, epi li enpòtan anpil pou nou rive jwenn plizyè milyon moun n ap desèvi yo ki pale yon lòt lang ki pa anglè. Se poutèt sa dènyèman nou te lanse yon nouvo pwogram sibvansyon pou fòme doktè ak asistan doktè yo sou bay swen ki apwopriye sou plan kiltirèl ak lengwistik pou moun ki gen yon konpetans limite nan anglè epi nou te kòmanse ofri yon $5,000 anplis nan ranbousman prè ak tout patisipan yo nan Pwogram Ranbousman Prè Kò Sèvis Sante Nasyonal la ki ka demontre konpetans nan lang panyòl epi ki angaje nan pratike nan yon zòn ki gen gwo bezwen pou sèvi pasyan ki gen konpetans limite nan anglè. Jodi a, mwen fyè pou m revele Plan Aksè Lengwistik HRSA aktyalize pou konstwi sou travay sa a epi asire aksè ak bon jan kalite swen sante nan elimine baryè lengwistik pou chak pasyan nan chak kominote kapab tande ak konprann."

Roselyn Tso, Direktè, Sèvis pou Sante Endyen yo (IHS)
"Bay plis aksè lengwistik nan enfòmasyon sou pwogram swen sante Sèvis Sante pou Endyen yo ak sèvis sante piblik yo bay manm nan kominote Tribi yo ka kontribye nan pi bon eksperyans swen sante, epi amelyore rezilta sante pou endyen ameriken yo ak moun natif natal Alaska yo nan tout nasyon an."

Bertha Alisia Guerrero, Direktris, Dosye Ekstèn Entègouvènmantal yo (IEA)
"Antanke yon pitit fi premye jenerasyon paran imigran ki pa pale anglè, mwen byen plase pou m konprann kijan aksè lengwistik enpòtan pou sante ak byennèt nou. Plan Aksè Lengwistik aktyalize sa a montre angajman IEA pou elimine baryè lengwistik ki limite aksè ekitab ak pwogram e resous sante ak sèvis sosyal yo."

Doktè Monica Bertagnolli, Direktris, Enstiti Nasyonal yo pou Sante (NIH)
"Lè pasyan ki gen konpetans limite nan anglè yo gen aksè ak enfòmasyon sou sante ki klè ak konpreyansib, yo gen pouvwa pou pran desizyon eklere sou sante yo, sa ki lakoz pi bon rezilta ak amelyorasyon byennèt. NIH pran angajman pou l bay enfòmasyon ki klè ak aksesib sou sante ak syans pou tout moun ka pwofite sa."

Admiral Rachel Levine, Sekretè Adjwen Sante an (OASH)
"Aksè lengwistik enpòtan anpil pou amelyore sante ak byennèt pou tout moun. Nan HHS, nou devwe pou aplike politik, pratik, ak pwogram ki priyorize syans, inovasyon, ak edikasyon pou avanse jistis sosyal ak ekite."

Melanie Fontes Rainer, Direktris, Biwo pou Dwa Sivil yo (OCR), e Prezidant, Komite Direktè Aksè Lengwistik HHS la
"Jodi a, nou selebre yon etap enpòtan pandan n ap devwale ak fyète Plan Aksè Lengwistik yo ki ajou pou tout HHS la. Plan sa yo montre angajman inebranlab nou pou egalite nan aksè ak sèvis sante ak sèvis sosyal, asire nou swen yo disponib e aksesib pou moun nan lang natif natal yo, ak kominikasyon efikas pou moun ki andikape yo. Sa a se yon temwanyaj devouman san kanpe nou pou asire tout moun atravè nasyon an, kèlkeswa lang oswa kapasite yo, ka jwenn aksè ak sèvis ak enfòmasyon enpòtan yo bezwen nan swen sante."

Loyce Pace, Sekretè Adjwen pou Dosye Mondyal yo (OGA)
"Pandan n ap fete 24yèm anivèsè Dekrè Egzekitif 13166 la, ki mande aksè amelyore ak sèvis pou moun ki gen yon konpetans limite nan anglè yo, Biwo Dosye Mondyal yo reyafime angajman li pou kòz enpòtan sa a. Nan mond nou an ki deplizanplis entèkonekte, kominikasyon efikas enpòtan anpil pou sante mondyal ak sèvis sosyal. Plan Aksè Lengwistik OpDiv/StaffDiv nou yo jwe yon wòl enpòtan nan kraze baryè lengwistik yo, pou asire tout moun, kèlkeswa lang lan, ka jwenn aksè ak sèvis esansyèl yo bezwen yo. Lè nou fè pwomosyon enklizivite lengwistik, nou ranfòse patenarya mondyal nou yo epi avanse objektif nou pataje an pou yon mond ki pi ansante, ki pi ekitab pou tout moun."

Kontramiral Felicia Collins, Sekretè Adjwen pou Sante Minorite yo e Direktris, Biwo pou Sante Minorite yo (OMH)
"Elimine disparite rasyal ak etnik sante atravè nasyon nou an egzije nou idantifye ak elimine baryè ki genyen nan aksè ak swen sante, e youn nan baryè sa yo se lang. Nouvo Plan Aksè Lengwistik OMH la demontre angajman nou parapò ak estrateji ki ka poze aksyon pou bay aksè lengwistik ki enpòtan nan pwogram ak resous nou yo.  OMH pral kontinye defann aksè lengwistik ki enpòtan kòm yon eleman enpòtan pou amelyore rezilta sante pou moun ki gen yon konpetans limite nan anglè."

McArthur Allen, Jij Administratif Anchèf, Biwo Odyans ak Kontestasyon Medicare yo (OMHA)
"Nou fyè dèske nou prezante Plan Aksè Lengwistik OMHA a pou avanse misyon komen Ministè an ak OMHA pou amelyore aksè pou moun ki gen konpetans limite nan anglè. Jodi a, n ap pran yon lòt etap enpòtan nan fòme swen sante ameriken an nan asire nòm OMHA yo pou jijman jis, kredib, e alè aplike egalman pou tout moun n ap desèvi yo."

Micky Tripathi, Ph.D., M.P.P., Asistan Sekretè pou Politik Teknoloji ak Kowòdonatè Nasyonal pou Teknoloji Enfòmasyon Sante (Aji) (ASTP/ONC)
"Aksè lengwistik se yon faktè kle nan ekite sante - baryè lengwistik limite aksè ak konpreyansyon yon moun e enfòmasyon enpòtan sou sante ak sèvis swen, epi limite kapasite yon moun pou pran desizyon sou swen sante pou tèt li ak fanmi li. Lè nou mete ajou Plan Aksè Lengwistik nou an (LAP), nou espere ranfòse pwogram IT sante nou yo ak inisyativ politik nou yo lè nou asire yo disponib e tout moun konprann yo, ansanm ak moun ki gen yon konpetans limite nan anglè (LEP) ak moun ki andikape yo."

Miriam E. Delphin-Rittmon, Ph.D., Sekretè Adjwen pou Sante Mantal ak Depandans ak Sibstans (SAMHSA)
"Aksè lengwistik se yon baz ekite, ki pèmèt nou satisfè bezwen divès kominote nasyon nou an. Plan sa a pral ranfòse konsantrasyon nou sou ogmante aksè pou popilasyon ki pa desèvi ase nan lang yo prefere a ak pwogram ki ankouraje sante mantal, anpeche move depandans ak sibstans, epi bay tretman ak soutyen pou ankouraje rtablisman."

Si w kwè ou menm oswa yon lòt pati yo te sibi diskriminasyon sou baz ras, koulè, orijin nasyonal, sèks, laj, relijyon, andikap, oswa konsyans, vizite pòtay pou plent OCR la pou depoze yon plent sou entènèt nan: https://www.hhs.gov/civil-rights/filing-a-complaint/index.html.

Pou asistans, kontakte Biwo Dwa Sivil HHS la nan (800) 368-1019, TDD gratis: (800) 537-7697, oswa nan imèl OCRMail@hhs.gov.